Kommune Qeqertalimmi Kommunalbestyrelsip 25-26. november 2025 Qeqertalimmi Kommunip pilersaarutaa 2025-2037 akueraa. Peqatigitillugu nunap immikkoortortaanut pilersaarutit arlallit akuerineqarput.
Kommunimut pilersaarut Pilersaarusiorneq aamma nunaminertat atorneqartarnerat pillugit Inatsisartut inatsisissaannik nalunaarut nr. 4, 25. januaari 2024-imeersoq naapertorlugu suliarineqarpoq kommunimilu nunaminertanik atuineq pillugu pingaarnertut tunngavissanut aalajangersakkat aalajangersarlugit.
Nunap immikkoortortaanut pilersaarutit, nunap immikkoortortaanut aalajangersakkat immikkuualuttortallit ilanngullugit ilusilersugaapput, kommunimut pilersaarummi pingaarnertut tunngavissanut aalajangersakkanut naapertuuttuusussat. Inoqarfinni 500-nik sinnerlugilluunniit inulinni nunap immikkoortortaanut pilersaaruteqarnissaq piumasaqaataavoq, kommuni nunaminertamik atuinissamik nalunaaruteqarnissaa pissappat.
Inoqarfinni 500-it ataallugit inulinni, Kommunalbestyrelsi aalajangersinnaavoq nunap immikkoortortaanut pilersaarutinik suliaqarniarluni, sumiiffiit attaveqaasersuutit pilersinniakkalluunniit atuuffissaa ajornakusoortuuppata, imaluunniit nunaminertamik atuinissami immikkuualuttortaqarnerusumik aqutsinissaq pisariaqartinneqarpat.
Pilersaarusiornermi piumasaqaatit
Kommunimut pilersaarummi kommunip pilersaarusiorneranut piumasaqaatit pingaarnerit allaaserineqarput:
Kommune Qeqertalimmi ineriartortitsineq pillugu takorluugaq pingaarneq.
Qulequttani pingaarnerni ineriartornerup killiffia:
- Innuttaasut sumilu nunassinneq
- Inuussutissarsiutit aningaasaqarnerlu
- Sanaartorneq sanaartukkatigullu ineriartorneq
- Attaveqaasersuutit kiffartuussinerlu
Ineriartornermik nunaminertanillu atuinermik anguniakkat.
Pilersaarusiorneq pillugu nassuiaat, makkuninnga allaaserinnittoq:
- Nuna tamakkerlugu pilersaarusiornermut immikkoortortanullu pilersaarutinut ataqatigiinneq
- Kommunip aningaasaqarnikkut pilersaarusiornera
- Kingullermik killiffissiuinerup (nunap immikkoortortaanut pilersaarutit, kommunimut pilersaarummut tapiliussat il.il.) kingorna kommunip nammineq pilersaarusiornera
Aaqqissuussaaneq pingaarneq
- Kommunip pissusia aaqqissuussaaneralu pillugit allaaserisaq.
- Kommunimi siunissami ineriartornissamut najoqqutassat.
Kommunimut pilersaarummi pingaarnertut tunngavissanut aalajangersakkat, nunap immikkoortortaanut pilersaarutit ilusilernissaannut aamma inatsimmik nalunaarut nr. 4, 2024-imeersoq naapertorlugu kommunip nunaminertanik atugassiisarnerinut tunngaviliisuupput.